احساس القرب من الله و لذته

جيب قهوتك و لا الشاي بتاعك و تعالي خد مني الكلمتين دول ..

هل شعرت يوما انك قريب جدا من ربنا - بتكلمه بيقين - بتحس باللذه في الذكر او الصلاه ..

بتحتاج ل سند و دعم -- تحس ان هو القادر المقتدر .. بيقول للشيء كن فيكون .

" كل شيء ب قدر معلوم .. كله بيجي في ميعاده "

مش معني انك تتمني حاجه دلوقت و متجيش دلوقت ان الدعاء لم يستجاب ..

الحديث النبوي الشريف : قال ﷺ:

«ما من مسلم يدعو بدعوة ليس فيها إثم ولا قطيعة رحم، إلا أعطاه الله بها إحدى ثلاث: إما أن يعجل له دعوته، وإما أن يدخرها له في الآخرة، وإما أن يصرف عنه من السوء مثلها».

قالوا: إذًا نُكثِر. قال: «الله أكثر». رواه أحمد والترمذي.

الحمد لله اولا و دائما - كل شئ عنده بقدر ..

بحب اوي اسمع سوره الحجر - بصوت القارئ هزاع البلوشي .. صوته عذب و لما تتدبر في الايات بتمس حاجات كثير جواك ...

يمكن اكثر ايتين بحب اسمعهم ، اكررهم كثير :

﴿فَوَرَبِّكَ لَنَسْأَلَنَّهُمْ أَجْمَعِينَ ۝ عَمَّا كَانُوا يَعْمَلُونَ﴾. [سورة الحجر: ٩٢-٩٣]

﴿وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ ۝ فَسَبِّحْ بِحَمْدِ رَبِّكَ وَكُنْ مِنَ السَّاجِدِينَ﴾. [سورة الحجر: ٩٧-٩٨]

يااااااااااه - عديت بايام كثيييييييير اوي صعبه بجد - نفسيتي كانت بتبقي في اقل حالاتها - لما احس اني وصلت للقاع يجي وقت تنزل اكثر كمان - سوره الحجر و خصوصا الايات دي كانت كثير بتريحني .. سبحان الله .. الواحد ساعات لازم يبقي في ضيق علشان يفتكر ان ليه سند و رب يلجأ ليه .. يا رب يفرج هم كل مهموم و كرب كل مكروب.

اوقات كثير حسيت ان صدري ضيق و مش قادر اخد نفسي .. حسيت ان استحاله الواحد يعدي المشاعر دي و الضيق دا ...

سبحان الله الدنيا بتعدي - الايام بتفوت .. " كل شئ سيمر لا محاله " الحمـــــــــــــــــــد للـــــــــــــــه

برضه فيه مقوله علمت في دماغي من يوم ما سمعتها في يوم - لما تبقي بعيد عن ربنا حاول تقرب و تغصب نفسك و تجاهدها ( صعب بجد ) - العباده عمل نشط محتاج تركيز مش مجرد اداء وقوف و ركوع و سجود و انت ذهنك مشتت او بتفكر في المكرونه الباشاميل اللي نفسك فيها !! 😂 .. بس لما تلاقي نفسك بتقرب ل ربنا استمتع بالوقت دا و ركز و قرب من ربنا علي قد ما تقدر .. مفيش حد بيبقي قريب طول الوقت ولا بعيد طول الوقت ... المؤكد ان القرب من الله مش هيجي و انت قاعد مكانك .. لازم تشتغل و تقرب --

قال رسول الله ﷺ فيما يرويه عن ربه عز وجل:

«مَن تَقَرَّبَ إِلَيَّ شِبْرًا، تَقَرَّبْتُ إِلَيْهِ ذِرَاعًا، وَمَن تَقَرَّبَ إِلَيَّ ذِرَاعًا، تَقَرَّبْتُ إِلَيْهِ بَاعًا، وَإِذَا أَتَانِي يَمْشِي، أَتَيْتُهُ هَرْوَلَةً» — رواه البخاري ومسلم

انت اللي تسعي - انت اللي تجاهد نفسك في الاول ... بس وقت ما هييجي الوقت اللي هتحس انك قريب هتحس ب لذه و راحه ما بعدها راحه .. لو فضلت قاعد مسستني مكانك - يا تيجي يا متجيش ... بس ااكدلك جاهد نفسك و اكيد هتيجي و دا وعد ربنا لينا ..

حديث رائع سمعته .. عن عبادة بن الصامت رضي الله عنه قال: قال رسول الله ﷺ:

«مَنْ تَعَارَّ مِنَ اللَّيْلِ، فَقَالَ:

لَا إِلَهَ إِلَّا اللَّهُ، وَحْدَهُ لَا شَرِيكَ لَهُ، لَهُ الْمُلْكُ، وَلَهُ الْحَمْدُ، وَهُوَ عَلَى كُلِّ شَيْءٍ قَدِيرٌ، الْحَمْدُ لِلَّهِ، وَسُبْحَانَ اللَّهِ، وَلَا إِلَهَ إِلَّا اللَّهُ، وَاللَّهُ أَكْبَرُ، وَلَا حَوْلَ وَلَا قُوَّةَ إِلَّا بِاللَّهِ،. ثُمَّ قَالَ: اللَّهُمَّ اغْفِرْ لِي، أَوْ دَعَا، اسْتُجِيبَ لَهُ، فَإِنْ تَوَضَّأَ وَصَلَّى قُبِلَتْ صَلَاتُهُ» رواه البخاري.

هل فيه اسهل من كدا ؟؟!!!! تقوم في الليل .. تتقلب في السرير - تقول اذكار ثم تدعو فيستجيب الله لك - ان شاء الله -

الخلاصه : ان الباب الي الله دايما مفتوح - و كثير هتلاقي صعب جدا تاخد الخطوات الاولي لانها بتحتاج جهاد مع النفس بس النتيجه المتوقعه تستاهل المجهود المطلوب . بفتكر دايما الحديث القدسي الشريف رواه البخاري ومسلم:

قال رسول الله ﷺ فيما يرويه عن ربه عز وجل:

«قالَ اللَّهُ عَزَّ وَجَلَّ: مَن تَقَرَّبَ إلَيَّ شِبْرًا تَقَرَّبْتُ إلَيْهِ ذِرَاعًا، وَمَن تَقَرَّبَ إلَيَّ ذِرَاعًا تَقَرَّبْتُ إلَيْهِ بَاعًا، وَإذَا أَتَانِي يَمْشِي أتَيْتُهُ هَرْوَلَةً» .